அன்பார்ந்த சகோதர, சகோதரிகளே,
 

நமஸ்காரம்,

#MeToo - WE TOO SUPPORT

உலகின் பல நாடுகளிலும் இந்தியாவிலும் காலம் காலமாக சமுதாயம் ஆண் சார்ந்த சமுதாயமாகவே இருந்து வந்துள்ளது.

காலமாற்றம் பெண்களுக்கு கல்வி வாய்ப்பு, வேலை வாய்ப்பு மற்றும் தொழில் முனையும் வாய்ப்பு ஆகியவைகளை பெருமளவில் வழங்கி வந்தாலும் ஆங்காங்கே ஆண் மேலாதிக்கம் தொடர்ந்து இருந்து வருவதனை நாம் காண்கின்றோம். பெண்களை ஓர் போகப் பொருளாக பார்க்கின்ற கண்ணோட்டம் முற்றிலும் அகற்றப்பட வேண்டும்.

வேலைக்கு செல்கின்ற பெண்கள் சந்திக்கின்ற பல்வேறு பிரச்சனைகளில் பாலியல் பிரச்சனைகளும் பிரதானமாக உள்ளன.

பணிக்கு செல்கின்ற பெண்களுக்கு மட்டும் தான் இது போன்ற பாலியல் பிரச்சனைகள் ஏற்படுகின்றன என்று இல்லை - பேருந்திலும், இரயிலிலும், ஷேர் ஆட்டோவிலும், பள்ளி, கல்லூரியிலும், கடைகளிலும், சந்தைகளிலும், உறவினர்களாலும், நண்பர்கள் வட்டத்திலும் மற்றும் அனைத்து துறைகளிலும் இதுபோன்ற பாலியல் பிரச்சனைகளுக்கு பெண்கள் ஆளாகி வருகின்றனர்.

பெண்களுக்கு எதிரான சமூக கண்ணோட்டத்தின் காரணத்தினாலும், உயர் அதிகாரிகளுக்கும், அதிகாரத்திற்கும், பண பலத்திற்கும், அரசியல் பலத்திற்கும் பயந்து கொண்டு இது போன்ற பிரச்சனைகளை பெண்கள் வெளியே சொல்லாமல் இருந்து வருவது நாடு அறிந்ததே.

சமூக ஆர்வலர்களின் பெண்ணிய உரிமைக் குரல்கள் பெண்களிடையே தன்னம்பிக்கையை ஏற்படுத்தி வந்தாலும் பாலியல் பிரச்சனைகளில் தேவையான விழிப்புணர்வு இல்லாத காரணத்தினால் பல பெண்கள் இதுபோன்ற பாலியல் அத்துமீறல்களை வெளியே சொல்ல முடியாமல் மௌனமாக இருந்து வந்துள்ளனர்.

தற்போது பிரபலமாகி வருகின்ற #MeToo  இயக்கம் இவ்விஷயத்தில் ஓர் பெரும் தாக்கத்தினை உருவாக்கி பெண்களிடையே தெளிவினையும், துணிவினையும் ஏற்படுத்தி வருகின்றது.

இதனை முதன்முதலாக ஏற்படுத்தியவர் தரானா பர்க் என்கின்ற பெண்மணி ஆவார். இவர் அமெரிக்காவைச் சேர்ந்த ஆப்பிரிக்க - அமெரிக்கப் பெண்மணி. நியூயார்க் நகரில் பிறந்த அவர், கல்லூரி படிப்பை முடித்த பின்னர், பாலியல் தொழிலால் பாதிக்கப்பட்ட பெண்களின் மறுவாழ்வுக்காக தன்னை அர்ப்பணித்துக் கொண்டார். பல பெண்கள் தங்களுக்கு நேர்ந்த கொடுமைகளை வெளிப்படையாக சொல்ல முடியாமல் தவிர்த்தார்கள். அப்போதுதான் அவரது மனதில் ஓர் எண்ணம் உதித்தது. பெண்கள் வலைதளம்  மூலமாக தங்களுக்கு நேர்ந்த பாலியல் அத்துமீறல்களை தைரியமாக பிறரிடம் பகிர்ந்துகொள்ளும் கருவியாக இந்த #MeToo  வினை உருவாக்கினார்.  இது தோற்றுவிக்கப்பட்ட ஆண்டு 2006. ஆனாலும் பொது மக்களிடம் அதிகம் பிரபலம் அடையவில்லை. கடந்த ஆண்டு அக்டோபர் மாதம் அலிசா மிலானோ என்கின்ற ஹாலிவுட் நடிகை தனது தோழி ரோஸ் மெக்கோவன் என்கின்ற சக நடிகைக்கு நேர்ந்த பாலியல் கொடுமைகளை இந்த #MeToo  மூலம் உலகத்திற்கு தெரியப்படுத்தினார்.

மாணவர்களுக்கு / இளைஞர்களுக்கு / ஆண்களுக்கு ஓர் பெண்ணுடன் எந்த அளவிற்கு அவர்கள் பழகலாம் என்பது பற்றியும், ஒவ்வொரு பெண்ணும் தன்னுடைய உடலுக்கு தன்னுரிமை பெற்ற சுய மரியாதைக்குரியவர் என்கின்ற எண்ணம் உருவாக்கப்பட வேண்டும் என்றும் உளவியல் நிபுணர்கள் கருத்து தெரிவித்துள்ளனர்.

இந்த #MeToo  இயக்கத்தின் நோக்கம் பெண்களுக்கு தற்போது தேவையான நல்ல வடிகாலாக இருக்கின்ற காரணத்தினால் இது வரவேற்கப்பட வேண்டிய இயக்கம் என்பதில் மாற்றுக் கருத்து இருந்திட முடியாது.

#MeToo  இயக்கத்தினுடைய நோக்கம் நமது பெண்களுக்கு விழிப்புணர்வினையும், துணிவினையும் கொடுத்திடும் தருணத்தில், தவறு செய்ய எத்தனிக்கும் ஆண்களுக்கு ஓர் எச்சரிக்கை மணியாகவும் இருக்கின்றது.

#MeToo  இயக்கத்தினை நேர்மைத் திறனோடு பயன்படுத்துகின்ற பெண்கள் பெரும் எண்ணிக்கையில் இருப்பினும் ஓர் சிறிய விழுக்காடு நிகழ்வுகள் கற்பனையாகவும், பொய்யாகவும் சித்தரிக்கப்படுகின்ற ஆபத்து இதில் உள்ளது.

கீழே குறிப்பிட்டுள்ள காரணங்களால் கூட #MeToo  துஷ்பிரயோகம் செய்யப்படலாம்.

அ) ஓர் பெண் ஓர் ஆணுடன் ஈர்ப்பு கொண்டு ஒருவரோடு ஒருவர் அந்தரங்கமாக பழகிவிட்டு நினைத்தது நடக்கவில்லை என்பதனாலோ அல்லது எதிர்பார்த்தது முழுமையாக கிடைக்கவில்லை என்பதனாலோ பின்நாளில் புகார் தெரிவிப்பது.

ஆ) ஓர் குறிப்பிட்ட ஆணை பழிவாங்கும் உள்நோக்கத்துடன் பாலியல் புகார் கூறுவது.

இ) குடும்ப சண்டை, பணம் கொடுக்கல் / வாங்கல் மற்றும் சொத்து சண்டை காரணமாக ஏற்பட்ட வெறுப்பு மற்றும் கோபதாபங்கள் அடிப்படையில் பொய்யான பாலியல் புகார் கொடுப்பது.

ஈ) ஓர் குறிப்பிட்ட மதம் அல்லது சாதியினை சார்ந்த ஒருவருடைய பொது வாழ்க்கை வளர்ச்சி பிடிக்காமல் பொறாமை கொண்டு பொய்யான பாலியல் புகார் கொடுக்கச் செய்வது.

உ) ஓர் ஆண் மீது பொய்யான பாலியல் புகார் எழுப்பிவிட்டு அந்த செய்தியினை பரவலாக்கி அவரை மிரட்டி பணம் பறிக்க முயல்வது.

ஊ) ஒரே இயக்கத்தைச் சார்ந்தவர்கள் தலைமைப் பதவி / முக்கியப்பதவி பெறுவதற்கு முறையாக இயக்கத் தேர்தலில் போட்டியிடாமல், குறுக்கு வழியில் பதவியினை அடைவதற்கு தலைமை மீதோ அல்லது ஓர் உயர் நிர்வாகி மீதோ ஜோடிக்கப்பட்ட புகார்களை நேரடியாகவோ அல்லது மறைமுகமாகவோ #MeToo  வில் கொடுக்கச் செய்வது   (Directly or Anonymously).

மேற்கூறிய துஷ்பிரயோக அபாயம் இருக்கின்ற காரணத்திற்காக, பெண்களுக்கான ஓர் மாபெரும் விடியலை நோக்கி சிறந்த நோக்கத்தோடு துவங்கப் பெற்றுள்ள #MeToo இயக்கத்தினை கண்மூடித்தனமாக எதிர்ப்பதோ அல்லது கைவிடச் சொல்வதோ நமக்கு ஏற்புடையது அல்ல.

#MeToo பகிர்வுகள் பகிர்வுகளாக மட்டுமே இருந்தும், மடிந்தும் போய்விடக் கூடாது. ஆகையினால் இது சம்மந்தமாக மத்திய அரசு அமைத்துள்ள பிரத்யேக குழு வெகு விரைவில் தக்க விதிமுறைகளை உருவாக்கி அவைகளை நடைமுறைப் படுத்திடச் செய்திடும் என்று எதிர் நோக்கிடுவோம்.

#MeToo

We Too Support

நன்றி,

இங்ஙனம்

உங்கள் அன்பு சகோதரன்

என்.நாராயணன்

மாநிலத் தலைவர்

என் கேள்விக்கென்ன பதில்
நடிகர் கமல்ஹாசன் மிகவும் அதிகமாக பேசுவது போல் தெரிகின்றதே?
கே.நடராஜன், விருகம்பாக்கம்
Read More ..
 
Online Payment
Now Make Your State Patron Magazine Subscription and Donation Through Online Payment Gateway Service Provide By THAMBRASS